احمد سالم يهاجم حسام حسن بسبب التصريحات الاخيرة

احمد سالم المتحدث الرسمى لنادى الزمالك

شن المتحدث الرسمى لنادى الزمالك هجوما حادا وقويا على حسام حسن المدير الفنى لمنتخب مصر بسبب تصريحات حسام حسن بعدم وجود لاعبين جيدين فى الدورى المصرى ويستحقون الانضمام للمنتخب المصرى

وكتب احمد سالم عبر حسابه الشخصى على فيس بوك

أنا عندي تحفظ علي تصريحات كابتن حسام حسن ، ليه ياكابتن حسام التصريحات دي وفي الوقت ده وعندنا فريقين بيلعبوا نهائي افريقيا

برغم إنك بتقول مفيش لاعبين يستحقوا الانضمام للمنتخب ومفيش عندنا دوري ، اهو طيب اهلي وزمالك في نهائي دوري الأبطال والكونفدراليه ، ليه انت قبلت تدريب المنتخب وانت عارف الوضع ده برغم إنك وكابتن ابراهيم عملتوا حمله كبيره لتدريب المنتخب محدش سألك انت معاك رخصه تدريبه ايه محدش سألك انت اخدت كام بطوله محدش سألك هل انت تطورت فكرك التدريبي محدش سألك مخدتش دورات في عالم التدريب من دول متقدمه رياضياً

شكلك بتمهد الهزيمه عشان بتقول منتخب مصر في 8 بس محترفين مقابل بوركينافاسو إللي عندها 27 محترف وغينيا عندها 22 محترف

برغم اغلبهم احتراف في انديه درجه ثانيه ويمكن تالته

الكل عارف إنك وكابتن ابراهيم العلاقه بينكم وبين محمد صلاح شبه مستحيلة وغيرتكم منه مش هتخلي المنتخب يقف على رجليه

طيب سؤال اخير ياكابتن حسام لما الناس طالبتك بضم سام مرسي حضرتك قولت مش جاهز برغم إنه لعب 42 مباراة من 42 مباراة

يعني الراجل جاهز غير استبعادك للاعبين مميزين الفكره بجد كابتن حسام بيمهد خروج المنتخب ياريت تعملوا متحدث رسمي للمنتخب بدل التصريحات إللي تقصف العمر دي ٠٠٠

وتولى حسام حسن الاسطورة المصرية تدريب المنتخب بعد اقالة البرتغالى روى فيتوريا بعد الاخفاق فى كاس الامم الافريقية الاخيرة

وخاض حسام حسن مع المنتخب الوطنى مبارتين وديتين فى البطولة الودية التى اقيمت فى مصر تحت مسمى كاس العاصمة واستطاع الفوز على نيوزيلاندا بهدف نظيف والخسارة فى النهائى من كرواتيا بنتيجة 4 اهداف لهدف

ويسعى حسام حسن لقيادة الفراعنة فى الوصول الى كاس العالم القادمة 2026 وسيستهل المشوار بلقاء بوركينا فاسو وغينيا فى التوقف الدولى القادم

تعليق الاعلامية على تصريحات حسام حسن

علقت الاعلامية لميس الحديدى على تصريحات الكابتن حسام حسن عبر برنامجها وقالت :-

الناس كلها كانت بتطالب بحسام حسن عشان عنده حماس وروح المشجع المصري مع العلم حسام جاي بقرار سيادي، عكس رغبة المسؤولين في اتحاد الكره،

 مش معقول بعد كل الدعم الجماهيري ده تطلع تقول معندناش كورة ومعندناش لاعيبة ومعندناش منتخب عكس كلامك وانت عالبر وانت قاعد تحلل في القنوات كنت بتقول عندنا ثروات في الأندية بس مين يستغلها، دلوقت مفيش لاعب يستحق الانضمام للمنتخب،

حضرتك في مهمة وطنيه عشان تعَلي من شأننا ولا تدوس علينا عشان في النهاية لما نسألك تقولنا بضاعة أتلفها الهوي

دلوقت الكره المصريه بتعاني من هبوط المستوي ياكابتن، علي كده بقي تعظيم سلام لكيروش علي منتخب وصل نهائي افريقيا وكوبر اللي وصلنا كاس عالم ومكانش عاجب خلاصة الكلام تقيلة عليك الشيلة متشيلش ياكابتن حسام