انجازات حسام حسن كمدير فنى ... الجزء الثانى

حسام حسن المدير الفنى لمنتخب مصر

رجع حسام حسن تاني لتدريب المصري في 2011-2012 وكان برضه مستواه متراجع ، لعب معاه 3 ماتشات فقط كسب انبي اللي كان قوي جدا ساعتها ، وتعادل مع الاسماعيلي في اسماعيلية برضه كان قوي جدا ، وكسب الاهلي في عهده الذهبي مع مانويل جوزيه 3-1 في مباراة مذبحة بورسعيد الشهيرة ، وساعتها كانت الهزيمة الوحيدة للاهلي في الموسم ده في 15 مباراة، وبعدها توقف الدوري وحسام ساب المصري

5- التجربة الأهم لحسام حسن كانت مع منتخب الأردن ، أولا لعب معاهم تصفيات كاس أمم أسيا ووصلهم للنهائيات للمرة الثالثة في تاريخهم ، لعب 6 ماتشات في المجموعة كسب 3 وتعادل 3 ولم يخسر أي مباراة، ودي كانت المرة الوحيدة في تاريخهم اللي يخوضوا تصفيات كاس امم أسيا ويوصلوا للنهائيات بدون أي هزيمة

الأهم بقى حسام لعب معاهم تصفيات كاس العالم 2014 ، الاردن كانت في مجموعة صعبة جدا مع اليابان واستراليا والعراق وعمان ، الاردن طلعت تالت المجموعة بعد اليابان واستراليا وتفوقت على العراق اللي كانت قوية ساعتها وعلى عمان ، ولعبوا ملحق التصفيات مع تالت المجموعة الاولى اللي كان اوزبكستان القوي جدا، ونجح حسام انه يقود الاردن للفوز على اوزبكستان ، وبعد كده لعب ملحق تصفيات كاس العالم مع أوروجواي اللي كانت قوية جدا ساعتها ومعاهم لويس سواريز وادينسون كافاني وابل هرنانديز ودييجو فورلان وطبعا كان طبيعي جدا ومنطقي ان الاردن تخسر ، حسام وصل مع الاردن لاعلى تصنيف في تاريخهم في تصنيف الفيفا ووصلوا انهم رابع أسيا

نسيت أقولكوا ان الاردن طول تاريخها كله موصلتش اساسا دور المجموعات الرئيسي للتصفيات اللي بيضم 10 منتخبات وبعدين بقوا 12 وفي كل التصفيات كانوا بيخرجوا من المرحلة التمهيدية ، ومع حسام في 2014 وصلوا انهم بقوا خامس أسيا ، انتوا متخيلين حسام حسن عمل ايه في تجربته الوحيدة لتدريب منتخب ؟! .. عمل فعلا من الفسيخ شربات

نسيت أقولكوا كمان حاجة أهم ان أوروجواي لما خرجت الاردن ووصلت كاس العالم في المجموعة كسبت ايطاليا وكسبت انجلترا وخرجتهم هما الاتنين من الدور الاول ووصلت هي دور الـ16 ، وييجي واحد جاهل يقولك حسام حسن فشل مع منتخب الأردن ومعملش انجاز عشان اتغلب من أوروجواي وموصلش كاس العالم 😃

6- تجربة مهمة تانية للعميد كانت مع الزمالك موسم 2014-2015 ، الموسم ده حسام بدأ الموسم مع الزمالك وهو اللي اختار القايمة بالكامل واختار اللاعيبة الجديدة ، حسام ضم للزمالك أحمد الشناوي وعلي جبر وأحمد دويدار وكوفي واسلام جمال وطارق حامد وابراهيم صلاح وأيمن حفني وأحمد عيد عبد الملك واحمد سمير وباسم مرسي وعبد الله سيسيه ورجع محمد ابراهيم

حسام بدأ الموسم بماتش السوبر مع الأهلي وكان الزمالك افضل واقرب للفوز وانتهى تعادل سلبي ولعبوا ركلات ترجيح وبرضه الزمالك كان اقرب بعد ما ضيع الاهلي اول ركلتين ولكن سوء حظ كبير الزمالك ضيع ركلتين بعد كده منهم واحدة في العارضة وخسر الزمالك المباراة والبطولة بسوء حظ غير عادي

بعد كده حسام مشي من الزمالك بعد 3 ماتشات بس في الدوري مش بسبب النتائج ولكن بسبب مشكلة حصلت بين ابراهيم حسن وبين ميدو، ومرتضى منصور اتدخل وحصلت مشكلة انتهت باقالة الجهاز الفني بالكامل بسبب الأزمة دي

عايز اقولكوا ان الموسم ده بالصفقات اللي حسام حسن اختارها الزمالك كسب الدوري لأول مرة بعد غياب 11 سنة كاملة ، وطبعا حسام يحسبله الانجاز الاكبر اختيار قايمة الفريق واللاعبين وفترة الاعداد القوية ، وشارك في الدوري بـ3 ماتشات ، وطبعا انتوا عارفين في أوروبا أي مدرب او لاعب بيشاركوا في بطولة بتتحسبلهم ، زي ما حصل مع صلاح لما خد الدوري مع تشيلسي واتحسبله وخد ميدالية وهو لعب 3 ماتشات فقط كلهم بديل ، وبالتالي البطولة تحسب للـ3 مدربين اللي تناوبوا على تدريب الزمالك في الموسم ده حسام حسن وباتشيكو وفيريرا لان كلهم ساهموا فيها وحسام ليه دور مهم جدا في بداية الموسم في اختيار اللاعبين اللي جابوا البطولة دي وفترة الاعداد اللي عملها

7- حسام بعد كده تولى تدريب الاتحاد موسم 2014-2015 ، الاتحاد قبل حسام بدأ الموسم أول 6 ماتشات كسب ماتش واحد وتعادل ماتشين وخسر 3 يعني خد 5 نقط من 18 بنسبة 27 % ، وكان في المركز 17 في منطقة الهبوط الموسم ده كان 20 فريق يهبط منهم 5 ، حسام استلم الاتحاد عمل طفرة رهيبة لعب 32 ماتش كسب 10 وتعادل 13 وخسر 9 ، يعني اخد 43 نقطة من 96 بنسبة 44 % اكتر من المدرب اللي قبله وقفز من المركز 17 الى المركز 14 واستمر في الدوري

نسيت أقولكوا حسام في الموسم ده كسب الاهلي 4-1 مع الرأفة في ملعبه في ستاد القاهرة وده اكبر فوز للاتحاد على الأهلي في التاريخ وأكبر هزيمة للأهلي في الدوري في أخر 40 سنة

8- نيجي بقى للتجربة الأقوى والأهم مع حسام حسن تولي تدريب المصري تاني لفترة طويلة من 2015 الى 2018 ، أول موسم ليه مع المصري وصلهم المركز التالت في الدوري بعد الأهلي والزمالك وده كان افضل مركز ليهم من 15 سنة ، وقاد المصري للظهور في بطولات افريقيا مرة تانية بعد غياب 15 سنة كاملة ، وفي الموسم ده حسام قاد المصري للفوز على الأهلي في القاهرة 3-2 ، واتعادلوا في بورسعيد 2-2 وكان المصري كسبان 2-1 والاهلي تعادل في اخر دقايق ، وكمان تعادل مع الزمالك في القاهرة 2-2 والمصري كان كسبان 2-1 والزمالك تعادل في الدقيقة 89

الموسم التاني اللي بعديه حافظ على تواجد المصري في المربع الذهبي واحتل المركز الرابع بفارق 4 نقط فقط عن الزمالك وحافظ كمان على ظهوره تاني في بطولات افريقيا للموسم التاني على التوالي ، وفي الموسم ده برضه تعادل مع الاهلي 1-1 وكان المصري كسبان لحد الدقيقة 87

اعداد خالد طلعت