تفاصيل رحيل علاء ميهوب عن النادى الاهلى .. حقائق واسرار رحيل الاربعة الكبار عن القلعة الحمراء

علاء ميهوب

علاء ميهوب احد نجوم الكرة المصربة بصفة عامة والنادى الاهلى بصفة خاصة الذى كان يعتبر من افضل ما انجبت مصر فى مركز خط الوسط حيث انه كان يمتاز باحراز الكثير من الاهداف على الرغم من انه لم يكن مهاجما حيث احرز ميهوب 11 هدفا مع القلعة الحمراء فى البطولات الافريقية وهو رقم لم يحققه الكثير من المهاجمين فضلا عن اهداف ميهوب المحلية والمؤثرة فى مسيرة وبطولات النادى الاهلى فمن منا ينسى هدفه فى اللحظات الاخيرة فى مرمى المصرى البورسعيدى فى نهائى الكأس عام 1984 والذى كان سببا فى عودة الاهلى الى اللقاء والفوز بالكاس .

وكذلك هدفه فى مرمى الزمالك فى ختام دورى موسم 1989 -88 والعديد والعديد من الاهداف .

دخل ميهوب القلعة الحمراء وهو بعمر ال13 من عمره ورحل عن النادى الاهلى وعمره 29 عاما قضى سنين طويلة يعتبرها من افضل ايام حياته .

روى علاء ميهوب نجم النادى الاهلى حكاية الفصل الختامى له مع النادى الاهلى عبر اون سبورت اف ام مع الاعلامى محمد الليثى

الليثى : عبر اون سبورت اف ام

 كابتن علاء إيه اللي دار بينك وبين كابتن صالح سليم يوم ما القرار إنك ماتكملش اتاخد؟

ميهوب: روحنا مكتب كابتن صالح في الزمالك كان مستنينا، قال يا جماعة إحنا أخدنا قرار إن أنتو ال4 مش موجودين معانا السنة دي، فاحب اسمع كل واحد فيكم عايز إيه، عايز يكمل ولا عايز أعمله ماتش اعتزال ولا إيه؟

الليثي: كابتن علاء ميهوب قال إيه؟

ميهوب: قولتله لا يا كابتن صالح أنا ماقررتش لسه فسيبني أفكر، مش عارف كنت بتكلم إزاي في اليوم ده.

الليثي: أنت رايح ومش عارف؟

ميهوب: لأ الاخبار كلها اتكتبت، رايح مش عارف ومش مصدق ولا عايز أعرف ولا أصدق ولا أستوعب إني هبقى بره النادي الأهلي وقتها كانت دماغي مقفولة تماماً لدرجة إني بعد ما خلصت مع كابتن صالح فضلت ماشي على رجلي، هو قالي خلاص القرار اتاخد، أنا بره الأهلي إزاي أنا ماعنديش حاجة تانية، أنت بتصحى وتنام على النادي الأهلي، كان سني 29 سنة، تخيل إن أنت من وأنت عندك 13 سنة لحد ما كملت 29 صاحي نايم بتفكر أنا رايح النادي، حياتك كلها مرتبطة بالنادي الأهلي والكورة، بروح بنفس الإحساس واللهفة، علشان كده لما جه القرار، أنا ماعنديش حاجة تاني، أنا ماشغلتش نفسي غير بالأهلي والكورة، ولا افتكرت أعمل مشروع ولا أي حاجة خالص، علشان كده ما استوعبتش القرار بسهولة، طب أنا هعمل إيه بكرة.

الليثي: ماروحتش الزمالك ليه؟

علاء ميهوب

ميهوب: كان صعب عليا أروح الزمالك كان صعب بالنسبة لي قوي مع إن فيه لاعب كبير كلمني علشان أروح الزمالك، مع إن الزمالك طبعاً أي حد يتمنى ينهي فيه، لكن ماكنش ينفع أنا متربي في الأهلي.

الليثي: التيشرت الأبيض ورقم عشرة ماكنتش هتقدر تلبسها؟

ميهوب: مافيش تيشرت بعد النادي الأهلي ممكن يغريني وولما روحت الأولمبي أخدت رأي كابتن جوهري وشجعني إني أروح.

الليثي: طب في حد يجيب الجول اللي أنت جبته في الأهلي؟

ميهوب: دي من اللحظات السيئة في حياتي أنت بتتكلم في إيه، من أحلى وأصعب الأجوال اللي جبتها لكن من أسوء اللحظات اللي عدت عليا لحد اللحظة اللي قاعد فيها معاك، لدرجة إن لاعيبة الأولمبي رايحين يهنوني لقوني ضايع.

الليثي: طب كنت خدتها ببطن رجلك كده؟

ميهوب: ماينفعش.

الليثي: القرار اللي اتاخد أنت شايفه أنه قرار كابتن صالح فعلاً

ميهوب: آه الأكتر كابتن صالح.

الليثي: بعد القرار ده ماشوفتش كابتن صالح بعد كده؟

ميهوب: لا خالص كنت بشوفه على طول وبتكلم معاه، وعلاقتي لحد اللحظة دي بكابتن صلاح حسني وأنور سلامة ممتازة وهم اللي كانوا موجودين وواخدين القرار، وبعدين ده كابتن صالح سليم أنت بتتكلم عن أسطورة تانية خالص، وكان بيتكلم معايا وبيحبني وهزر ومعايا في اليوم المشئوم ده وإحنا في المكتب.

الليثي: هو القرار ده اتاخد علشان كان فيه اتجاه إن كابتن طاهر أبو زيد كفاية فقالك ناخد باقية الكبار معاهم؟

ميهوب: بالضبط.

الليثي: علشان مايتقلش أنه طاهر أبو زيد بس؟

ميهوب: آه خصوصاً إن أنا وطاهر طالعين مع بعض وفي نفس السن.

الليثي: طيب ليه؟

ميهوب: ماعرفش

الليثي: ده كابتن طاهر أسطورة من أساطير الكورة؟

ميهوب: طاهر أسطورة في الملعب واعرفه بره الملعب تخيل أن بتتعامل مع شخص من وأنت صغير لحد لما كبرنا كده هو هو نفس الشخص بجدعنته ورجولته وبطباعه بكل حاجة تحبه تكرهه هو كده، مافيش حد فينا عنده كل الصفات حلوة أو كامل، ده شخصية جميلة .

جدير بالذكر ان النجم علاء ميهوب يشغل الان منصب مدير الكرة بنادى فيوتشر وعمل بمجال التدريب مع مانويل جوزيه وكذلك حسام البدرى .